| 西門's profile西門谷BlogLists |  Tools  Help |
|
June 26 第二百三十九集 我係外星人 遇上火星人篇又唔知由幾時開始做o既非正式統計，o係堆填區入面，o係自稱係外星人當中，其中有五成，認為自己係火星人；而另外有百分之十五，就認為自己係木星人；而另外更有百分之十，就覺得，自己係銀河系以外星體o既人。
對於呢個現象，我地依然百思不得其解。
我o地，好困惑。
今集故事o既主角，係一名失業多時o既男子；佢o係堆填區裡面，由朝早，一直等到天黑，風雨不改。
佢，叫做強仔。
強仔，佢日日總會o係呢一條後巷o既角落，o係度來回踱步，好似諗緊一d o野咁，不過，好少人會理佢，亦都無人有興趣理佢。
我o地觀察左佢好耐，而o係呢一日，我地終於走近佢身邊……
記者：「喂，你o係度做緊乜。」
強仔：「噢，點解……你會見到我……你係咪火星人o既朋友……」 o係強仔o既眼中，o係堆填區入面，就只有外星人……沒有地球人。
強仔：「你睇o下佢個樣！」
強仔煞有介事咁，突然企起身，用佢o既食指，狠勁地指向左邊，彷彿就係引證緊，火星人o既存在，所言非虛。 強仔：「我好似聽緊佢o係度唱緊《我來自火星》。殊！！」
『人潮像繁星～火星只可似火星～空氣未允許任性～……』
強仔：「係咪呀？」
相信對於一般人o黎講，係無人明白佢o既思維方式，不過，o係佢自己o既世界入面，就好清楚，自己身處係一個乜野o既處境。
記者：「咁你o係呢度其實係點？你無o野做o架！」
強仔：「我有，我o係度學火星文。」 強仔o係呢一刻，突然走到o係佢附近o既一堆攤檔，佢o地都係賣緊揮春o既。而呢d o既攤檔o既東主，我o地可以暫且叫住佢地做A、B、C、D及E小姐，而佢o地，同我o地上一集的主角秋姐，都係相識o既。
強仔：「你睇o下呢d火星人，你知唔知佢o地寫緊咩揮春……」
記者：「喔……咩o黎o架？」 強仔：「呢d……咪就係火星文囉。呢度先有o架咋……」
我o地o既記者，o係呢一刻，信念，有少少動搖，因為，我o地好似明白一d o野咁，但又講唔出係d乜。
強仔：「其實……我都好想畫o下揮春，過o下日辰，不過，我又怕俾班囂張跋扈o既火星人排擠……我o地……都唔係同類。」
記者：「你驚o左佢o地？」 強仔：「少少啦，不過我驚我自己……會寫d比火星人更火星人o既揮春……攪亂檔，到時d火星人o既首領……會好嬲怒，會殺死我。」 強仔一副誠惶誠恐o既表情，再加上無奈o既眼神，感覺上，到處都係發酶o既味道，空氣入面……有好多歎息。
記者：「咁你覺得佢o地係火星人，咁你自己又係咪火星人呀。」
「總之，我唔係地球人。地球之上，就連風神都可以咁快被纖滅，可想而知，地球……無希望。」強仔拍抬回應。 強仔：「世界太大，火星多怪人，而冥王星咁遠……死o左都唔知咩事；或者，我可能係處身月球之上，做一個……月球上的人。」
o係呢一集，我o地得到一個啟示，就係我o地千祈唔可以視而不見，或者歧視自稱係黎自外星既人。
而下一集，我o地會帶你o地，去睇一睇o黎自哈巴星球o既故事，各位請準時收睇，再會。 TrackbacksThe trackback URL for this entry is: http://simon919.spaces.live.com/blog/cns!E3C8E4CC3A954D35!887.trak Weblogs that reference this entry
|
|
|
